Helgina 12. – 13. sept var úr mörgu að velja fyrir áhugasama cavaliereigendur.  Smáhundadagar í Garðheimum voru haldnir og ýmsar kynningar þar í gangi, cavalierganga á sunnudeginum og sýningarþjálfun á sunnudagskvöld.  Af þessum sökum mættu óvenju fáir í lausagöngu með hundana sína sem að þessu sinni var í Varmadal við Mosfellsbæ.  Ellefu hundar af öllum litum mættu þó glaðir og kátir með eigendum sínum sem létu ókræsilegt veðurútlit ekki hamla för.  Gengið var frá bílastæði niður að á og síðan meðfram henni að ágætis áningastað.  Þar var dregið upp nesti og sátu menn lengi að spjalli meðan hundar hnusuðu og léku sér.  Rættist mjög úr veðri og í dalnum var lygnt, hlýtt og engin úrkoma, þó grasið væri vissulega blautt.  Göngunefndin þakkar skemmtilegu fólki fyrir mætingu og minnir á næstu göngu sem verður  sunnudaginn 18. október kl. 13.00, en þá ætlum við að Snorrastaðatjörnum á Reykjanesi.

Myndir í albúmi merktu Varmidalur  sept. 2009